Francisco Doñatek, EHU/UPVren Leioako Medikuntza eta Erizaintza Fakultateko Anatomia eta Giza Enbriologia arloko katedradunak, gorputza zientziari eman zioten hildakoen errautsak gorde zituen 26 urtez, haien gordelekua izango zen panteoi txiki bat eraikitzeko asmoz.
Jasotako dohaintzekin eta EHU/UPVren laguntzaz, 2003an, “Bizitzaren Basoa” inauguratu zen. Gorputza zientziari eman dioten pertsona guztien omenez egindako oroigarria da, haiek gabe medikuntza irakastea ezinezkoa izango litzateke eta.
Eraikinak ez bezala, sekula ixten ez den gune bat da (fisikoki, bisualki eta kontzeptualki). Ez dago biderik, ez aterik, ez ordenarik, ez zenbakirik, ez mugarik…Baso bat da.
Medikuntzako ikasleen lehen jardunbideetako bat Bizitzaren Basoa bisitatzea da. Haren osaera eta esanahia azaltzen dizkiete, baita nor ostatatzen duen ere. Gune berezia da. Handik igarotzen direnengan eragina dauka.
‘Bizitzaren Basoan’ jarritako idazkunak honela dio hiru hizkuntzetan: «Hemen daude eskuzabaltasunez gorputza zientziari eman zioten hildakoen errautsak. Heriotzak bizitzari ematen dio bide».
